Tepuy Roraima, Venezuela

Trip Start Aug 25, 2011
1
38
45
Trip End Feb 01, 2012


Loading Map
Map your own trip!
Map Options
Show trip route
Hide lines
shadow

Flag of Venezuela  , Bolívar,
Wednesday, December 28, 2011

Nach em für mich unerreichbare Gipfel vom Pico Bolívar han i mir no e Hoger usgsuecht, wo nid ufgrund vo sinere Höchi e Schwierigkeit darstellt: dr Tepuy Roraima.
Das isch e Tafelbärg im üsserschte Südweschte vom Land, im Dreiländereck Venezuela-Guyana-Brasilie. Es isch dr höchschti vo dene über 100 Tafelbärge vo Venezuela - isch aber mit 2'800m nid würkli bsunders hoch. Allerdings bin i au nid wäg dr Höchi oder emne bsundere Gipfelerläbnis dört ufe, sondern wül d'Gran Sabana generell e usgschproche schöni Landschaft isch, und wül obe uf em Plateau vo de Tafelbärge e komplett anderi Wält azträffe isch. E Tier- und Pflanzewält wo durch die vertikale Felswänd vo dr räschtliche Wält wytgehend trennt isch, und sich drum au eigeschtändig entwicklet het. Drum git's dört obe au vieli endemischi Tier- und Pflanze-Arte. Und es isch eifach an sich e anderi Wält mit kuriose Felsformatione und emne eigene Klima. D'Wält obe uf em Roraima het scho 1912 em Arthur Conan Doyle als Vorlag für sini "The Lost World" dient, genauso wie d'Tepuy vo dr Gran Sabana im Pixar-Zeichetrickfilm "Up" (2009) e Hauptrolle schpiele. Naja, ich ha das halt eifach müesse gseh, und ha Bock uf e 6-Tages-Trek in dr Gran Sabana gha.

D'Tour han i scho im Vorus in Ciudad Bolívar buecht gha. Leider isch mi bevorzugt Tourabieter scho usbuecht gsi, aber es git einigi Agenture, wo de Trek abiete. Ich bi denn mit em Nachtbus in rund 12 Schtund nach Santa Elena de Uairén an die brasilianischi Gränze gfahre. Bim Briefing bi dr Agentur vor Ort het sich zwar usegschtellt, dass dr Chef vo dere Agentur, wo'n ich denn buecht ha, e ziemlich überzügte Esoteriker isch, wo scho mehreri Büecher über e Roraima, d'Ufos wo me dört tagtäglich söll gseh und die Usserirdische, wo dört sölle wohne, gschriebe het. Nachdäm ich es paar kritischi Frooge gschtellt ha, het er mir aber versicheret, dass die Tour nid nur für Ufo-Jünger isch, sondern für alli wo uf de Hoger wänd. Und schpöter het sich denn usegschtellt, dass au die andere Teilnähmer sowie sogar unseri Guides und Träger sini Yschtellig überhauptnid teile sondern sich eher über ihn und sini Vorschtellige luschtig mache. Mir sind jedefalls e glatti, durchmischti Truppe gsi (1 Venezolaner, 2 Brasilianer, 2 Mexikaner, 5 Japaner und ich; 4 Fraue, 7 Manne; Alter 25 bis 53), und mir sind denn au nid go Usserirdischi sueche.




















































































































































D'Landschaft isch würkli sehr schön gsi, und die öfters wolkeverhangene Tafelbärge händ halt scho öppis bsunders. D'Tagesetappe sind ziemlich bescheide gsi - also vo mir us hätt me chli längeri Etappe chönne mache, aber es het anderi gha, wo rächt am Aschlag gsi sind. Also easy. Und wül mir Zält, Chochutensilie und s'Ässe nidemol sälber händ müesse schleppe, sondern Träger gha händ für das, isch au dr Rucksack nid so schwer gsi (also so 12-14kg han i öppe scho gha).
Dr erschti Tag isch ziemlich flach gsi, dr zweiti ziemlich z'duruf, dr dritti extrem steil z'duruf. Und denn sind mer scho d'obe gsi. Und denn isch übrigens Silveschter gsi! Ich bi also an Silveschter d'obe uf em Plateau gsi. D'Silveschternacht isch denn aber ziemich übel gsi. Und zwar nid wül ich irgend e Party oder so erwartet hätt. Schliesslich goht me an somene Ort nach em Znacht und em Ydunkle - also öppe am 18:30h - sowieso ins Zält und go schloofe. Dört obe ziehnd sich au praktisch jedi Nacht d'Wolke zämme und es chunnt cho rägne und öfters cho schtürme. Und das isch denn au an dere Silveschternacht dr Fall gsi. Wül's wägem Silveschter-Hochsaison-Peak kei Platz in de schützende Felshöhle gha het, händ mer ziemlich exponiert müesse campiere und sind drum voll dr rauhe Witterig usgsetzt gsi. Aber s'eigentliche Problem isch viel meh gsi, dass unsere Tour-Abieter Zält verwändet, wo weder wind- no wasserdicht sind. Und so sind scho öppe am 8i z'obe unseri Zält durchnässt und unseri Schloofsäck durchtränkt gsi. Dr Wind het durch d'Zält gschtobe und die gfühlti Temperatur het öppe 0ºC betreit. Schlotternd statt schloofend hän mer so d'Silveschternacht verbrocht und 9 Schtunde lang d'Minute bis zum Tagesabruch zellt. Ich ha mi ächt gfrogt, ob ich die Nacht wird überschtoh oder ob i dr Unterchüehlig zum Opfer fall. Tja, also mis 2012 het nid ganz optimal agfange. Aber sithär isch es ständig besser worde... ;-)





























































































Jedefalls händ mer denn am folgende Tag scho wieder abe müesse, statt no ei ganze Tag uf em Plateau z'blybe wie plant. Unseri Schloofsäck sind nass gsi, und wül sich an däm Tag d'Sunne nid würkli zeigt het, hän mer kei Chance gha zum d'Sache tröchne. Und so'n e Nacht het niemer nomol welle duremache. Und so simmer, ohni uf em Plateau grossi Exkursione gmacht z'ha, wieder abgschtiege und bis zum Camp vo dr erschte Nacht zrugg-gloffe. Dört isch wieder so warm gsi, dass s'nasse Material nid so gschtört het, wie uf em Bärg. Und ich ha mis Züüg sogar vollständig chönne tröchne, wül ich scho am Nomittag im Camp acho bi.


















Mir sind natürlich alli ziemlich sauer gsi uf unsere Tour-Abieter. Me cha doch nid e Tour uf e Bärg abiete, wo's praktisch jedi Nacht schtürmt und rägnet, und denn nume Zält zur Verfüegig schtelle, wo weder wind- no wasserdicht sind. Und wie uns unsere Guide gseit het, isch das scho mehrmols vorcho; die vo dr Agentur händ also scho gwüsst, dass ihri Zält nüt tauge.
Jedefalls sind mer, wo mer zrugg in Santa Elena de Uairén gsi sind, gschlosse ins Büro marschiert und händ unserem Ärger Luft gmacht. Mir händ zwar d'Hälfti vo unserem Gäld zruggbecho, aber es blybt dr bitteri Bygschmack, dass dä Typ genauso wird wyterfahre und bald scho die nöchschti Gruppe uf em Roraima in ihrne durchnässte Schloofsäck fascht wird verfriere.

Rückblickend isch aber de Trek - abgseh vo dr Silveschternacht - ganz toll gsi. Dr Spass in dr Gruppe und mit de Träger, die schöni Landschaft, die surreali Obeschtimmig mit dene Tafelbärge, die kuriose Felsformatione uf em Plateau, D'Ussicht vom Plateau über d'Gran Sabana...






Und do no e ganz andere Schnappschuss us de Schtroosse vo Santa Elena de Uairén:

Slideshow Report as Spam

Use this image in your site

Copy and paste this html: