Canaima / Salto Angel, Venezuela
Trip Start
Aug 25, 2011
1
37
45
Trip End
Feb 01, 2012
Canaima National Park, Guayana Highlands, Venezuela
Monday, December 26, 2011
Scho während em 1-stündige Flug het sich die schöni Landschaft vo dr Region "Gran Sabana" mit ihrne Flüss, Wälder und Tafelbärge zeigt.
Canaima isch eigentlich es "Indianerdorf" irgendwo in dr Gran Sabana, und isch nume per Flugzüg erreichbar. Allerdings isch dr Flugplatz trotz em chleine, offene Abfertigungsgebäude mit ere befeschtigte Landebahn usgschtattet, sodass au grösseri Tourischtemasse mit grössere Flugzüg chöne y- und usgfloge wärde. Schliesslich handlet sich's bim Salto Angel um eini vo de gröschte Tourischteattraktione vo Venezuela.
Grad bim Dorf befindet sich dr See namens Laguna de Canaima, wo me scho es paar schöni Wasserfäll cha beschtuune. Und s'spektakuläre dra isch, dass me bi zweine drvo au cha hinde de Wasserfäll durelaufe. Und das isch im Fall saugeil! Zwüsche dr Felswand und de tosende, abeschtürzende Wassermasse chunnt me sich vor wie imene Pirateversteck. Natürlich wird me vo dr Gischt sofort pflotschnass, und au s'Fötele isch wäge dr Füechti chuum möglich, aber das Umespaziere hinter em Wasserfall isch für mi eigentlich sogar ydrücklicher gsi als dr Ablick vom grossartige Salto Angel am nöchschte Tag...
[
Nach dr Übernachtig in Canaima isch es denn mit em schmale Flussboot los gange Richtig Salto Angel. S'Boot han ich z'erscht als Fehlkonstruktion verurteilt, wül bim Bug ständig s'Wasser uf beide Site ufeschprützt und me drum laufend nass wird bzw. blybt. Aber im Lauf vo dere 4-schtündige Bootsfahrt han i denn gseh, dass mer uf em Wäg au ziemlich zünftigi Schtromschnälle, Flachwasserbereich und schmali Wildwasserstelle zwüsche grosse Felsblöck hän müesse passiere. Und das wär mit andere Boot wohl chuum gange.
Obwohl i uf dr Fahrt ziemlich nass worde bi und mir gli mol dr Arsch weh do het, isch es e ganz schöni Flussfahrt gsi. Mir sind immer wyter in d'Landschaft mit dene Tafelbärge ydrunge. Und d'Wolkefätze wo immer chli an dene Tepuy (=Tafelbärge) hange, händ dere ganze Szenerie no chli e mystische Touch geh.
Mitti Nomittag sind mer denn am Fuess vom Salto Angel acho. Und nach emne eischtündige Fuessmarsch uf ne Ussichtspunkt, het me'n en ändlich mol in siner ganze Grössi gseh. Und das Ding isch jo sooooo hoch, dass me gar nid schnallt, wie hoch's isch. Also aschynend betreit d'Höchi vom gsamte Wasserfall 979 m, und die vom Hauptfall 805 m. Ich glaub gschätzt hätt i höchschtens 600 bis 700 m. Aber isch würkli ganz nätt, das Ding. Ydrücklich isch, wie zytlupemässig langsam s'Wasser dört abesäglet - das isch wohl au e Hiewys, dass dä Wasserfall tatsächlich ziemlich hoch isch.
Jedefalls sind mer vom Ussichtspunkt wieder abegloffe, bevor d'Dunkelheit und die abertuusige vo Moskitos cho sind. Übernachtet hän mer denn in eim vo dene Hängematte-Camps am Fluss. Dört het me fein kocht für uns, und zu mim grosse Erschtuune het's sogar Schtromgeneratore und e Duschi gha. Pah, Luxus!
Am nöchschte Tag sind mer z'erscht wieder per Boot zrugg nach Canaima und nach em Zmittag han ich denn e Cessna gha, wo mi wieder zrugg nach Ciudad Bolívar gfloge het.
Foto-Stilstudie "Ich und der Salto Angel in verschiedenen Stimmungslagen":
Rückflug:
