Mérida, Venezuela

Trip Start Aug 25, 2011
1
35
45
Trip End Feb 01, 2012


Loading Map
Map your own trip!
Map Options
Show trip route
Hide lines
shadow

Flag of Venezuela  ,
Saturday, December 10, 2011

D'Reis nach Mérida mit em Nachtbus het es paar Schtund länger duurt als vorgseh. Wäge de übermässig starke Rägefäll in den ledschte Mönet sind d'Schtroosse in de Bärge mehrheitlich beschädigt und vielfach unpassierbar. Drum mues me Umwäg fahre und irgendwo in dr Pampa dr Bus wächsle. Schliesslich sind mer vo Tür zu Tür über 20 Schtund unterwägs gsi. Erschwerend isch no drzuecho, dass mer irgendöppis wo'n i unterwägs gässe ha, überhaupt nid guet do het, und sich in dr ledschte Schtund vo dere Fahrt mi Verdauigstrakt mit Chrämpf und emne üsserscht dringende Entleerigsbedürfnis bemerkbar gmacht het. Es Tankstelle-WC am Stadtrand vo Mérida het mer denn s'Läbe grettet...





D'Stadt Mérida isch eigentlich nid würkli öppis Bsunders, aber doch ganz agnähm, und im Verglych zu Caracas au viel sicherer. Me gseht vo dr Stadt d'Bärge rundume und es herrscht es sehr agnähms, nid zu heisses Klima.
D'Hauptattraktione sind d'Bärge, wo näbscht Bärgtoure und Wanderige au River-Rafting oder Gleitschirmfliege ermögliche. Au d'Seilbahn uf e "Pico Espejo" (4800müM) isch e grossi Tourischte-Attraktion. Es isch die höchschti und längschti Seilbahn vo dr Wält. Allerdings isch sie wäge Renovation sit 3 Johr zue, und es dürft no 2 wyteri Johr duure bis sie wieder offe isch.





D'Heladería Coromoto ghört au zu de Attraktione, das isch e Glacé-Schuppe mit über 900 verschiedene Glacésorte (Guinness-Buech-Rekord), und unter dene het's au ganz viel komischi Gschmacksorte wie Hamburger, Tintefisch, Wienerli, Chnoblauch etc.





















Tourischte het's grad nid allzuviel gha, obwohl im Dezämber eigentlich die ultimativi Hochsaison isch. Aber wül ebe d'Schtroosse kaputt sind, und dr Flughafe sit emne Unfall gschlosse blybt, gönd d'Venezolaner das Johr offebar eher ans Meer als in d'Bärge.


E Kuriosität vo Venezuela mues i au no schnäll verzelle; und zwar dr Benzinpriis. Bekanntlich het jo Venezuela sehr groossi Ölresärve und die wärde em Volk quasi gratis zur Verfüegig gschtellt. Dr Benzinpriis isch staatlich verordnet, an jedere Tankstell identisch und betreit für e Liter Super 0.07 BsF, für Bleifrey 0.097 BsF. Und das sind im Fall so um die 1 Rp. pro Liter. E Tankfüllig Super choschtet also öppe 50 Rappe. Im Gegesatz zum Benzin choschtet Mineralwasser fascht 100 mol meh!






Ich ha denn mit em Engländer Mitch, wo'n i sit Tobago kenn, mol e 2-tägigi Tour zum Rio Catatumbo und em Lago Maracaibo gmacht. Do sind mer z'erscht mol 4 Schtunde durch d'Bärglandschaft vom Staat Mérida gholperet, bis in die tiefere Gefilde zum Catatumbo-Fluss. Dört sind mer uf es Boot umgschtiege, wo uns zum Maracaibo-See brocht het. Vor allem am Fluss git's viel Viecher z'beobachte, unter anderem Kaimane, Fischadler,  und ganz viel anderi Vogelviecher. Bevor mir denn in unserem offene Pfahlhuus uf em See übernachtet händ, sind mer mit em Boot und Schynwärfer uf Nachtsafari und händ tatsächlich meheri Baby-Kaimane gfunde und es paar Üüle.









Ich ha mi eigentlich vor allem uf's Liechtspektakel vo de sogenannte "Relámpagos de Catatumbo" gfreut. Das isch es Wätterlüüchte mit über 250 Blitz pro Schtund, wo in 140 bis 160 Nächt pro Johr immer am gliiche Ort stattfindet. Allerdings isch in dere Nacht s'Wätterlüüchte nid würkli intensiver gsi, als wie me's öfters in dr Schwiz au gseht. Als unerwünschti Kompensation het uns denn am 3 am Morge es heftigs Gwitter überrascht, wo fascht unseri Sache in See bloose het und unseri Hängematte, Schloofsäck und Chleider ziemlich durchnässt het. Das Gwitter het uns denn ziemlich uf Trab ghalte. Naja, uf emene Pfahlhuus z'mittst im See, me cha sich's jo öppe vorstelle, wo d'Blitz ygschlage händ...
Nach es paar Schtund Schloof isch denn dr Morge wieder absolut friedlich gsi und dr See ganz ruhig. Nach em Zmorge händ mer denn no es paar Delfin gseh umekurve, und denn sind mer per Boot und Jeep wieder zrugg Richtig Mérida.







Wenn i scho in de Bärge bi, will i au chli go wandere oder trekke. Und do het's jo in dr Region vo Mérida au mehreri Möglichkeite geh. Me mues das dört aber mit emne Guide mache und drum, damit's nid allzu tüür wird, au als Gruppe. Allerdings het's nid würkli viel anderi Lüt gha, wo grad öppis ähnlichs im Sinn gha händ. Schliesslich han ich mi denn dr Belgierin Nele agschlosse, wo uf e knapp 5'000 m hochi Pico Bolívar het welle. Das isch dr höchscht Bärg vo Venezuela, dr Trek duurt 4 bis 6 Täg, und beinhaltet im obere Teil chli Fels- und Iischlättere.
Am erschte Tag sind mer denn per Jeep zum Usgangspunkt gfahre, zum Bärgdorf Los Nevados uf 2'700 m. D'Schtrooss dört hie isch au in guetem Zuestand nume mit 4-Rad-Atrieb z'bewältige. Und jetzt nach dene Unwätter het das Unterfange für uns Tourischte e ziemlich läbensgföhrliche Ydruck gmacht. Aber obwohl dr Jeep im Schlamm immer wieder umegschlitteret und zum Schtroosserand grutscht isch, wo's es paar hundert Meter s'Loch abegoht, sind mer nach 4 Schtund unbeschadet in Los Nevados acho. Und dört händ mer denn au übernachtet.






Am zweite Tag isch dr Fuessmarsch über e 4'200 m hochi Pass bis zur Seilbahnstation "Loma Redonda"uf 4'000 m agschtande. D'Seilbahn-Zwüschestation isch zurzyt e Baustell, und nid ganz überraschend sind dört au es paar Schwizer vo dr Garaventa am Schaffe gsi. Wül unsere Guide die Lüt kennt, wo in dr Nacht d'Baustell bewache, hän mer, nachdäm d'schwizer Baufüehrer z'obe zrugg ins Tal sind, chönne im Gebäude vo dr Station choche, ässe und sogar übernachte. Dinne isch es zwar nid würkli wärmer gsi als dusse, aber wenigschtens chli windgschützt.








Am dritte Tag han i mi denn irgendwie nüm so 100% wohl gfühlt. Ich ha ziemlich schlächt gschloofe, offebar het sich d'Höhechrankheit chli bemerkbar gmacht. Mir sind denn uf 4'800 m ufgschtiege, wo sich d'Bärgstation "Pico Espejo" vo dr Seilbahn - die höchschti Seilbahnstation vo dr Wält - befindet. Dört hän mer d'Zält, s'Ässe etc. zrugg-gloh und sind mit em Chlättergrümpel wyter. Ich ha mi denn eigentlich wieder chli besser gfühlt. S'Abseile bim Zwüscheabschtieg isch sehr guet gange, aber wo's denn uf dr andere Site wieder ufe isch, het sich mini Situation vo Minute zu Minute verschlächteret, bis i schliesslich atemlos mit Chopfweh, Schwindel und Übelkeit ha müesse kapituliere. Zum Glück hän mer perfekti Wätterbedingige gha, und so han i eifach allei wieder es Stückli abe chönne go warte, während die andere zwei schnäll uf e Gipfel klätteret sind. Während em anderthalbstündige Warte han i mi allerdings au nid würkli chönne erhole. S'einzige wo in dere Situation hilft, isch dr Abstieg. Aber bevor i in agnähmeri Höchene ha chönne abstiege, han i z'erscht nomol 200 m ufe, uf e Pico Espejo zrugg müesse. Das Stück het au no es paar Chlätterpertie beinhaltet, dört wo mer uns uf em Hiewäg abgseilt händ. Naja, es isch denn ziemlich happig gsi, aber irgendwie han' is tatsächlich gschafft. Es isch, als wär me bsoffe - mit em Unterschied, dass me alles wo passiert ganz nüchtern mitbechunnt, au wenn me nüt drgege cha mache. Me verliert s'Glychgwicht, torklet, me het ziemlich übels Chopfweh, es isch eim schlächt und vor allem het me e Puls vo 200 und keucht und japst nach Luft... Und das macht s'Chlättere jo nid würkli eifacher.





































Wül mir e Übernachtig uf em 4'800 m hoche Pico Espejo nid sehr wohl do hätt, hän mer denn also wieder wyter abe müesse. Und wül unsere Guide jo die Lüt vo dr Seilbahn kennt, het er denn organisiert, dass mer mit dr Seilbahn bis zur 4'000 m hoche Loma Redonda chönne abefahre. Und so hän mer denn tatsächlich au mol mit dr höchschte und längschte Seilbahn vo dr Wält chönne fahre, obwohl die jo eigentlich grad usser Betrieb isch. Die nöchschti Übernachtig isch also wieder uf 4'000 m uf dr Loma Redonda gsi, wie d'Nacht vorhär.

Für mi isch es wieder e ziemlich übli Nacht gsi; chalt, hart, mit Chopfweh und nid viel Schloof. Erscht am nöchschte Tag, wo mer bis ganz ins Tal abe sind, isch es mer denn öppe ab 3'200 m wieder guet gange. Abgseh vo dr Müedigkeit als wär nie öpis gsi. Jedefalls hän mer denn no e schöne Abstieg gha durch Wieselandschaft und dichte Näbelwald, und am Nomittag sind mer zrugg gsi in Mérida.
Slideshow Report as Spam

Use this image in your site

Copy and paste this html: