Indonesien ist. Anders.

Trip Start May 28, 2012
1
15
25
Trip End Jul 26, 2012


Loading Map
Map your own trip!
Map Options
Show trip route
Hide lines
shadow
Where I stayed
Sukapura Permai

Flag of Indonesia  , Java,
Wednesday, June 27, 2012

D'Fahrt hett mi elend lang dunkt, weli scho de ganz Tag nüt anders gmacht ha wie warte. Usserdem hemmer no Stau gha, drum isch d'Fahrt no länger gange. Mer sind denn au dementsprechend müed in Sukapura (Vorort vo Bromo) acho. Ich bi müed gsi (warte macht ja so öppis vo müed) und kabut. D'Reby und ich hend nur Schissdräck (Chips, Nüssli, Guetzli...) gässe und nie würkli öppis vernünftigs. Mer hend denn beschlosse, dass mer wiiter unde am Berg übernachted, wels günschtiger isch und denn am nächschte Tag eifach chli länger hend zum uf de Vulkan zcho. Für s'Zimmer hends 150'000 welle und ned welle mit sich verhandle lah. Wiiter obe seighs no vel türer und es isch Hochsaison, es sind all Zimmer usbueched. Ja ok, das hani mer würkli no chönne vorstelle. Und für de Transport ufe hends 300'000 Rp welle. Wie bitte?!?! Ich hans ned chönne glaube! Jetzt wohnemer scho ufem Vulkan und zahled nomal 300'000, gahts no? Ich bi mer dete scho sicher gsi, dass das en vel z'hohe Bulepriis isch und bi ned bereit gsi das z'zahle. Ha anderi Möglichkeite welle ghöre, aber vel hetts ned gha, wel d'Abfahrt ja am Morge am halbi 4i isch. Töff wär no e Möglichkeit gsi, aber es isch sooo chalt gsi und ufem Töff würs mega zieh und d'Reby isch susch scho verchälted (immerno...). Vor allem brüchtemer 2 Töff und denn chunnts au wieder tür. Drum hani denn ehm übertüürte Auto zuegseid und bin grad go schlafe.

Paar Stunde spöter lüüted scho wieder de Wecker. Morge am 3 ufstah, halbi 4i abfahre. Mer stiiged ines 4-Radatriibauto (chan mer öpper säge wie das richtig heisst?? :)) und es gaht los. De Hotelbsitzer hett gseid gha es göchi 30 Min. Nach enere Stund halted de Chauffeur a und seit: so, jetzt chönder dene Pföschte folge und denn sinder det. Es isch immerno stockdunkel gsi und kei Sau isch det am lauffe gsi. Es sind all Autos wiiter ufegfahre. Ich ha ehm denn gseid gha, ich wett ganz ufe. Und er seit das seighi aber ned so abgmacht und ich denn: Mol, mer hend schliesslich es Vermöge zahlt, mer wend z'oberscht ufe. Und denn seit de doch, dass es aber meh choschted und das ned abgmacht seigh und dass er zersch muess ehm Hotelbsitzer alüte. Ich bi mer sicher gsi, dass das alles inszeniert isch. Die hend das so abgmacht, dass mer meh müend zahle. Isch ja klar stiigemer ned i de Mitte vom Nirgendwo us und lauffed ohni Taschelampe und ohni en Blasse Schimmer z'haa wo dure lauffe. Ich ha denn au s'Vergnüege gha mitem Hotelbsitzer z'rede. Bevor ich verzelle, was ich oder bzw wie ich mit ehm gredt han, mueni chli ushole. D'Kultur in Indonesie isch generell scho so, dass mer enand ned sett kränke. Niemert sett müesse sis Gsicht verlüre. In Java isch das alles no vel extremer. Anstatt 'nei' seit mer 'velecht'. Anstatt 'ich weiss es ned' (Saya tidak tau) seit mer 'ich ha zwenig Wüsse da drüber' (Saya kurang tau). Mer fuuchtled ned mit de Ärm umenand, zeigt ned uf Lüüt, reded ned mit enere luute Stimm und zeigt kei Gfühl, sondern hett immer es fründlich driblickends Gsicht. Ich probiere mich iiimmer abzpasse, wenn ich imene andere Land bin, aber mit dem wo i de letschte paar Täg passiert isch, mitem Gfühl verarscht zwerde, mitem Ziitrdruck, wel d'Sunne bald ufgaht und mer vorher wend det sii zum de Sunneufgang zgseh, mitem Hungergfühl und minere Müedigkeit, han ich ned andersch chönne als gege alli Verhaltensregle zverstosse. Ich bin scho für Schwiizeverhältnis sehr verruckt und unfründlich gsi und für javanischi Verhältnis mueni also es Bischt gsi sii. Ich ha mit de Ärm gfuchtled und mit enere luute Stimm gflueched. Ich ha mich soo verarscht gfühlt. Ich wirde abzockt und cha ned mal öppis degäge mache. De Hotelbsitzer hett nomal 100'000 verlangt. Ich ha denn ehm Fahrer eifach gseid er sell ufefahre mitem Vorhabe s'Gäld nachher ned z'zahle oder sicher Rabatt zverlange. Es isch denn nomal 30' im 45 Gradwinkel holpernd de Vulkan duruf und dur Sanddünene gange (mer hetted das nieee chönne lauffe!). 

Obe acho hetts kei Parkplätz meh gha und denn hemmer es Stückli müesse lauffe. Es isch scho heller worde und mer hend kei Ahnig gha wie wiit es isch drum hemmer en Töff gno, wo mer natürli au wieder hend dörfe zahle. Brrrr... isch das chalt gsi. 4 Grad und das in Indonesie. De ganz Platz isch mit Lüüt volle gsi und mer hend nüüt gseh. Mer hend eus denn fürekämpft und sind über es Gländ klättered. Vo dete us ischs chli gförlicher gsi, wel grad de Abgrund dete gsi isch, aber mer hend no e gueti Sicht gha. Ach, isch das schön gsi det obe. Mer hend chönne zueluege, wies immer heller wird und wo sich dSunne zeigt hett, isch es langs 'woahhhh..' dur d'Mänschemängi. Vom Mount Bromo us hett mer e sehr gueti Sicht uf ganz vel anderi Vulkan gha und es isch cool gsi zum zueluege, wie sie dank de Sunne d'Farb ändered. De einti Vulkan hett au all paar Minute wieder Rauch usegspuckt.

Ufem Wäg abe hani grad no schnell d'Glägeheit gnützt zum anderi Lüüt fröge wie vel sie zahlt hend zum uecho, zum usefinde wie fescht mer verarscht worde sind und wie fescht ich mich nachher sell wehre. Die andere Lüüt hend aber no meh zahlt wie mer. Velecht hani ehm Fahrer und ehm Hotelbsitzer unrächt tah. Bim Hotel acho hani mi scho welle entschuldige, aber denn hends nomal 50'000 meh verlangt und das hett mi wieder verruckt gmacht, wel sie das ned vo Afang a hend chönne säge und ichs fräch finde, wenn mer so nach Luscht und Luune gaht go Priise erhöhe. Vor allem bini au verruckt gsi uf de Hotelbsitzer, wel er eus ned informiert hett, dass mer a zweine Orte cha halte und dass die ned gliich vel choschted und dass mer meh Ziit mue iberächne, wenn mer wiiter ufe wett. D'Reby und ich hend eus vo Afang a ned wohl gfühlt i dem Hotel und hend so schnell wie möglich welle weggah. Also hemmer en Bus uf Probolinggo gno, wo mer ines Reisebüro sind und euse nächschti Trip zum Ijen Krater bueched hend.

Unterkunft: Sukapura Permai

Slideshow Report as Spam

Comments

Tantli on

so ist es, Indo ist anders, was du nur alles durchmachen musst.... obwohl ich nicht jesdes Wort (Schwizer-Deutsch) verstanden habe.... ich verstehe dich sehr gut....

Add Comment

Use this image in your site

Copy and paste this html: