Zruegg nach Phnom Penh und ufs Visa warte

  Phnom Penh, Cambodia
Tuesday, January 16, 2007

Am naechschte Morge hani de scho wieder henne frueh uf muesse, woeu si mi am siebni vorem Hostel hei woeue uflaese. Ideckt mit es paar Banane u Orange hani de am Morge no es Baguette drzue gkouft u bi ids klapprige Boessli igstiege. Er isch sicher no 20 Minute desumegfahre u het dr Bus gfueut. Naehr ischs ueber Dirtroadszur Busstation gange. E ziemlech houprigi aglaegeheit.

Bir Busstation het mi de dr Billetkontrolleur komisch agluegt (es het mi scho a Kuala Lumpur erinneret) u het de mis Billet umgschribe u mir es anders gaeh. Im Bus hani de zersch mau mi Sitzplatz nid gfunge. Dae isch de Schlussaendlech naebe ere junge Kambodschanerin ghocket u ha mit ihre mit Haend u Fuess probiert z komuniziere. Sie het numme sehr wenig Aenglisch choenne, drfuer no Japanisch u Chinesisch. Da hei mis Aenglisch, Duetsch u Franzoesisch ou nid ghoufe.

Mir hei de d'Aessenspouse ou grad zaeme gmacht, was bi einige andere Mitfahrende dr Idruck het erweckt, das mir es Paar si. Die hei das aui ziemlech luschtig gfunde (natuerlech uf Kmehr u ig ha keis Wort verstande).
Im Boess chunt d Klimaalag nume solang nache, wies dusse ou nid auzu heiss isch. Irgendeinisch ma si de nuemme nache, was zur Foug het, das es im Boess oeppe 28 Grad isch. Nabscht daem louft ununterbroche ds Unterhautigsprogramm am TV. Lokali Pop-Karaoke (quitschendi Frouestimme zu ere art Dudusack-Gige gmisch) i vouer Lutsterchi abgwaechslet vo grotte schlaechte Komedi-Serie. Das finde d Kambodschaner aber ziemlech unterhautsam, zmindscht hei si nid mitgsunge..

Dr Boess isch am freuche Nami ziemlech am andere aendi in Phnom Penh acho. I bi de z fuess zruegg zum Hotel gloffe, ueber 6 spurigi Strasse, duer puri lokali Quartier (vorhaer aeuae no nie e Touri duere cho) u natuerlech wieder naebe hunderte Toeffli-Chauffeure. D Beatrice het mir keis Mail gschribe, so hani mau agno, das sie mir es Zimmer reserviert het. Bingo. Nachdaem Sie de niene isch umegsi, bini mau zum Central Market no chli ga Sight Seeing und Shoping betribe. Ufem Central Market bechunnt me so ziemlech aues, wo me sich so cha vorsteue: Pflanze, Gmuess, Fleisch, Fisch, Stoeffli auer Art, Chleider, Massazueg, Elektronik Artiku (inkl I-Pod etc), Siuber u Goudschmuck, Uhre, Unterwoesch, Buecher, Hygiene-Artiku, Papeterie-Artiku etc... Das Ganze oeppe ufere Flaechi vo zwoei Fuessbaufaeuder.

Am Abe hani d Beatrice nume churz gseh. Sie isch grad wieder i usgang u ersch zruegg cho, wo ig scho lang gschlafe ha. I ha mir ja oeppis anders vorgsteut wie zaeme Reise so funktioniert. Sie het de churzum ou beschlosse, dass Sie nid uf Indie wot u isch ihres Visum de nid ga abhole.

So bini de am naechschte Morge elei loszoge u ha mi Toefflifahrer ziemlech im Zueg umeghetzt. Aus erschts hani mi Pass bir Indische Botschaft abgaeh u bi de naehr ids Tuol Sleng Museum, woeu das no grad ir nechi isch gsi. Naehr bini zu de Killing Fields gfahre worde. Das isch ca. 14 km usserhaub vor Stadt, was zur Foug het, das es numme no ueber Dirtroads gange isch. Bim haere fahre hets e henne verchehr gha. Uf dr einte chruezig hei mir sicher e zwoeiminute-Slalom zwuesche chruez u quer stehende u hupende Outos gmacht, bevor mir am andere aendi si usecho (So chunnts use, we me zwoei 6-spurigi Strasse ohni Ample oder Kreisu chruetzt).

Dr Verchehr isch sowieso no bemerkenswaert. Jede luegt uf jede u gfahre wird wos grad Platz het. Regle gitz nid, nume Richtlinie: mi cha ou uf dr linge Spur fahre, d Richtlinie waeri Raechts usw...

Nachdaem das ig dert oueber die Graeber gstouperet bi, han i no es Zmittag woeue aesse u e Art e Pouletgaedder-Gmuess-Suppe mit Ris uebercho. I ha aber scho bim erschte Biss e Braechreiz gspuerrt u ha z Taeuer de la stah. Naehr hani mi zruegg id City la fahre. I bi so viu zfruech dran gsi (fuer ds Visum), das ig vorhaer no grad mau zwoei Stund ids Internet gange bi u a mine Brichtli ha umebaschtlet. Naehr bini de no mi Pass bir Indische Botschaft ga abhole. Ou a daem Tag vor Beatrice kei Spur. Sie isch de am Abe Spaet mau zruegg cho u het de no so haub vorwurfsvou gmeint, oeb ig ech es Taxi fuere naechscht Tag bsteut heigi (natuerlech nid!).

Am naechschte Morge ischs de mit dr Air Asia mau zruegg nach Ton Sai gange. Mit dr Beatrice hani gloub ufem ganze Waeg oeppe 10 Minute gschnurret. D Flueg si a daem Tag ziemli houprig gsi. Churz vor Krabi het sech e grossi Gwitterzone ufbout gha u dr Flueger het es Paar heftigi Luftloecher duerfloge. D Landig isch de so Lothar-Paris aehnlech gsi. So d Landepiste usem Faenschter sittwaerts vor sich gseh...