Ton Sai Bay die Erschti

  Ton Sai Bay, Thailand
Thursday, December 14, 2006

Am naechschte Morge ha ig mi de mau ellei ufe Waeg zum Pier gmacht. Die andere hei ane andere Hafe mueesse, woeu si mit em ne groessere Schiff nach Phi Phi gfahre si.
I bi vo Krabi mit em Longtail-Boat bis zum Railay-East Beach gfahre u dert, woeus Low Tide isch gsi, oeppe 200m duer ds seichte Wasser ine gloffe. Guet hani am Morge Flip Flops montiert u d Turnschue im Rucksack versorget gha. I bi de mit Sack u Pack via Railay West ueber d Steine (das geit nume bi Low-Tide) uebere a Ton Sai Beach cho. Da's scho Mittag isch gsi, ischs e ziemlech heissi aglegeheit gsi. I ha de mau afa Bungalow sueche u ha waehrenddesse dr Baenne (e Chlaetterer us Baern) atroffe. Wo ig de mis Bungi ha gha, ha ni mi mau unter ds Vouk gmischt. Es het sech da scho e raecht grossi Schwizer-Truppe formiert gha mit Platz fuer Asyl vo andere duetschsprachige Zytgenosse.
Ds Laebe dert beschribt sech oeppe so: schlafe, aesse, chlaettere, laese, Schach spiele, dumm umeschnure, ir Haengematte chille, Partys fiire und so witer.

So hani i de erschte vier Wuche hie itze choenne afa 7a's chlaettere (das hani vorhaer no nie choenne). D'Chlaetterei chunnt mir nach em Surfe ziemlech entgaege, woeus hueffig ender churz u sportlech isch. I de laengere Toure geit mir immer obe dr Pfus us. Am Afang hani no chli mueh gha, mir Chlaetterpartner z'organisiere, des het sech aber de schlussaendlech ganz guet igspiut.

Ds Waetter isch fuer die Jahreszyt ender z'nass gsi. Es het immer oeppe wieder graegnet, isch aber im grosse u ganze ok.

Nach zwoei Tag si de die Andere vo Phi Phi ou a Ton Sai Beach cho u si de grad laenger blibe aus das si hei woeue. Das geit abgseh drvo gloub aune so, wo keis fixes Programm hei (u die mit em fixe Programm loeh dr naechscht Termin meischtens suse). Es isch e super-entspannti Stimmig mit viu Chlaetterer u settigne wos nach eire Wuche waerde. Am Railay Beach aene gsehts e chli anders us. Dert het dr Pouschaltourismus afa zueschla und es isch ei risigi Bousteu gsi. Bis am 26 Dezember hei si mitedrinn ueberau Schutt umelige gha. Da ischs ues i de "biuige" Bungalow am Ton Sai besser gange. Dr Beach isch zwar nid ganz e so schoen (Foeteli nume bi Fluet mache), aber d Luet drfuer viu entspannter.

Zwuescheduere hani aber trotzdaem bi Lili und Sifi Asyl uebercho, und ha mi aube so richtig Warm und usgibig choenne Dusche. Bi mim Bungalow wo ig i de erschte drue Wuche gha ha isch meischtens dr Wasserdruck nume grad so gsi, das es usem Duschichopf isch usegruennelet, u das ou nume we me ne nid ueber e haube Meter ab Bode gluepft het. Wenn de ds Wasser mau funktioniert haetti isch de drfuer sicher grad wieder dr Generator fuere Strom abglaege. Wasser und Strom hei zaeme nume saeute funktioniert.
Drzue hani mis Bungalow mit oeppe tusig Ameise und ere Ratte teilt. Einisch isch sogar es Skorpion z'bsuech cho. i ch gmeint, das i das scho vertschaupet ha, u has mit em ne Flip Flop usem Bungalow spediert. Dusse ischs de zu mim erstune drvo grennt!
I ha immer oeppe wieder de Vermieter gseit, das sie doch bitte z'Wasser loe la loufe oder luege das es funktioniert. Irgendeinisch ischs mir u ihne de zviu worde u si hei mi churzerhand usegschosse. Super, de steisch ir Houptsaison ohni Bungi da. I ha de fuer zwoei Naecht im ne biuige Bungalow ohni WC u ganz ohni Liecht (het ou mit noeier Bire nid gluechtet) uebernachtet. Fuer Naehr hani scho e Wuche vorhaer eis reserviert gha.

Erwaehnenswaert si no d' Deep Water Soloing Usflueg (bis itze zwoei) wo mir gmacht hei. Wie immer han i s nid so mit em Abegumpe u hami eher uf d Traversene konzentriert. Die andere si zum Teil sicher oeppe bis uf 12 oder 14 m ufegchlaetteret bevor si nuemme si witercho. Die wo grad nid am chlaettere si gsi, hei de gfoetelet oder gschnorchlet. Ds Zmittag si mir de uf dr Chicken-Island ga naeh. Die het e Sandbank, wo bi Fluet unterwasser isch u me mit em Boot cha drueberfahre (we me e so e verrueckte Bootsfahrer het wie mir).

Fuer aui nid-Chlaetterer: Deep Water Soloing beduedet, das me a) d Chlaetterschue Nass macht, b) ohni Sichernde ueber em Wasser chlaetteret u c) am Schluss abegumpet oder waehrend em Chlaettere abegheit (natuerlech ids Wasser). Platsch